Бүгүн, 22-февралда Султан Ибраимов атындагы Ош улуттук драма театрында 23-февраль – Ата Мекенди коргоочулар күнүнө арналган иш-чара өттү.

Ага Ош шаарынын мэри Бакытбек Жетигенов да катышып, аскер кызматкерлерин куттуктады.

“Бүгүнкү күн бир гана жоо бетинде турган жоокерлерибизге эмес, бул — биздин экономикабызга, саламаттык сактоого, билим берүүгө, маданиятыбызга жана идеологиябызга күн сайын эмгеги менен салымын кошуп жаткан ар бир атуулга тиешелүү деп билебиз. Ушул куттуу күнү чын жүрөгүмдөн Мекенибизде тынчтык болуп, мекен сакчылары бейпилдикте кызмат өтөөсүнө тилектештигимди билдирүү менен ар бир үй-бүлөгө жакшылык, бакыт-таалай, ынтымак жана бакубатчылык каалайм. Ардагерлерибизге өрнөктүү өмүр, чың ден-соолук, узун өмүр тилейм. Ал эми жоокерлерибиз менен офицерлерибизге ийгиликтүү кызмат өтөп, Мекенди сүйүүнүн каарман үлгүсүн көрсөтүп, кайраттуу, жана күчтүү аскер болуусун  каалайм”, - деди мэр.

Мындан сырткары аскер кызматкерлеринин Ата Мекендин чек арасын коргоого кошкон салымы баса белгиленип, татыктуу кызмат өтөө шарттарын камсыз кылуу боюнча мамлекеттик деңгээлде жүргүзүлүп жаткан иштер тууралуу айтылды.

Мыкты кызматы жана жоокерлердин аскердик-патриоттук духун чыңдоого кошкон салымы үчүн бир катар кызматкерлер Ардак грамоталары сыйланышты. Иш-чара шаардык майрамдык программа менен коштолду.

Бүгүн, 21-февралда Ош шаарынын мэри Бакытбек Жетигенов “Манас-Ата” МАБынын Авиагородок кичи районунун жашоочуларынын көйгөйлөрү менен жеринде таанышты.

Анын алкагында бул аймактагы №42 “Жоогазын” бала бакчасын оңдоо, кичи районду инфраструктуралык өнүктүрүү маселелери көтөрүлдү.

Калаа башчысы тиешелүү кызматтардын жетекчилерине Аэропорт көчөсүндөгү №1 жана №2 үйлөрдүн ортосундагы балдар аянтчасын капиталдык оңдоп-түзөөдөн өткөрүү жана мындагы скверди иретке келтирүүнү пландоо тапшырмасын берди. Мындан сырткары, ички жолдорго щебень төгүү, көчөлөрдү жарыктандыруу жана таштандыларды тазалоо маселелери көтөрүлдү.

Бакытбек Жетигенов Аношина көчөсүнө да барып, тургундардын көйгөйлөрүн укту. Жергиликтүүлөрдүн канализация маселесин биргелешип каржылоо программасы аркылуу чечүү тапшырмасы коюлду.

Ошондой эле жарандар эскирген электр мамыларын алмаштыруу, таштанды ташуучу унаалардын ишин иретке келтирүү маселелерин билдиришти.

Калктын көйгөйлөрүн чечүү боюнча тиешелүү кызматтарга тапшырмалар берилди. Статистика боюнча бул көчөдө 500дөй үй-бүлө жашайт.

Ош шаарында 23-февраль - Ата Мекенди коргоочулардын күнүнө карата мекеме-уюмдардын мырзалары арасында волейбол боюнча мелдеш башталды.

Ош шаарынын мэринин орун басары Сонунбек Жунусбаев мэрдин атынан келе жаткан майрам менен куттуктап, турнирдин катышуучуларына ийгиликтерди каалады.

Турнирдин катышуучулары үч профессионалдык топко бөлүнүшөт. Биринчи топко шаардагы мекеме-уюмдардын, анын ичинде билим берүү тармагынын, саламаттыкты сактоонун, күч түзүмдөрүнүн жана аскер бөлүктөрүнүн кызматкерлери кирет. Экинчи топто жогорку жана орто атайын окуу жайларынын окутуучулары болсо, үчүнчү топту студенттер түзөт.

Турнирдин негизги максаты - республикалык жана эл аралык мелдештерге катышуу үчүн командаларды түзүү, сергек жашоого жана спортко үндөө, ошондой эле майрамдык маанай жаратуу болуп саналат.

Турнирге 37 команда катышууда. Мелдеш 21-22-февраль күндөрү өтөт.

Анын жеңүүчүлөрү Дене тарбия жана спорт комитетинин Ардак грамоталары, дипломдору, кубоктору, баалуу сыйлыктары менен сыйланышат.

Бүгүн, 21-февраль күнү ОшМУда Бүткүл дүйнөлүк эне тил күнүнө карата жыйынтыктоочу салтанаттуу иш-чара болуп өттү.
Анын алкагында Кыргызстан элдеринин ассамблеясынын Ош шаарындагы бөлүмүнүн улуттук маданий борборлорунун көргөзмөсү өттү.
Ошондой эле студенттер менен бирге ар улуттун өкүлдөрү улуттук маданиятты, ырым-жырымдарды, каада-салттарды чагылдырган концерттик программа тартуулашты.
Белгилей кетсек, Ош шаарында Эл аралык эне тил күнүнө карата жарыяланган бир айлыктын алкагында эне тилди өнүктүрүү максатында сынактар өткөрүлдү.
Жеңүүчүлөр Ош шаарынын мэриясынын ыраазычылык каттары жана акчалай сыйлыктары менен сыйланышты.